ஜம்மு காஷ்மீர் மாநிலம் பாராமுல்லா மாவட்டத்தில் நடந்த என்கவுண்டரில் 2 தீவிரவாதிகள் சுட்டுக் கொலை செய்யப்பட்டனர். ஹடிபோரா பகுதியில் பாதுகாப்பு படையினர், காவல்துறையினருடன் இணைந்து நடத்திய துப்பாக்கி சூட்டில் இருவர் கொல்லப்பட்டனர்.
ஜம்மு காஷ்மீர் மாநிலம் பாரமுல்லா மாவட்டத்தில் பயங்கரவாதிகளுக்கும் பாதுகாப்புப் படையினருக்கும் இடையே புதன்கிழமை என்கவுன்டர் நடந்ததாக அதிகாரிகள் தெரிவித்தனர். பாரமுல்லா மாவட்டத்தின் வாட்டர்காம் பகுதியில் தீவிரவாதிகள் நடமாட்டம் இருப்பதாக கிடைத்த தகவலையடுத்து, பாதுகாப்புப் படையினர் புதன்கிழமை காலை அங்கு தேடுதல் வேட்டையில் ஈடுபட்டதாக அதிகாரிகள் தெரிவித்தனர்.
பாதுகாப்புப் படையினர் மீது பயங்கரவாதிகள் துப்பாக்கிச் சூடு நடத்தியதைத் தொடர்ந்து தேடுதல் நடவடிக்கை என்கவுண்டராக மாறியது என்று அவர்கள் தெரிவித்தனர். இதில் 2 தீவிரவாதிகள் சுட்டுக்கொலை செய்யப்பட்டனர்.
இதற்கிடையில், என்கவுண்டரில் ஒரு ராணுவ வீரர் மற்றும் ஒரு போலீஸ்காரர் காயமடைந்ததாக வட்டாரங்கள் தெரிவித்தன. அவர்கள் மருத்துவமனைக்கு மாற்றப்பட்டுள்ளனர், அங்கு அவர்களின் உடல்நிலை சீராக இருப்பதாக மருத்துவர்கள் தெரிவித்தனர்.
