கள்ளக்குறிச்சி அரசு மருத்துவமனைக்கு தமிழக வெற்றி கழக தலைவர் விஜய் வந்துள்ளார். விஷச்சாராயம் அருந்தி சிகிச்சை பெற்று வருபவர்களை சந்தித்து வருகிறார். கள்ளக்குறிச்சி மருத்துவமனையில் சிகிச்சை பெற்று வருபவரிடம் தமிழக வெற்றிக்கழக தலைவரும் நடிகருமான விஜய் நலம் விசாரித்தார். பாதிக்கப்பட்டவர்களுக்கு அளித்த சிகிச்சை குறித்து கேட்டறிந்தார். கள்ளக்குறிச்சி கருணாபுரத்தில் விஷச்சாராயம் அருந்தி இதுவரை 39 பேர் உயிரிழந்துள்ளனர்.
முன்னதாக த.வெ.க தலைவர் விஜய் தனது எக்ஸ் பதிவில், “கள்ளக்குறிச்சி மாவட்டம், கருணாபுரம் பகுதியில் கள்ளச் சாராயம் அருந்திய 25க்கும் மேற்பட்டோர் காலமான செய்தி, மிகுந்த அதிர்சியையும் மன வேதனையையும் அளிக்கிறது. உயிரிழந்தவர்களின் குடும்பத்தினருக்கு எனது ஆழ்ந்த அனுதாபங்களைத் தெரிவித்துக்கொள்வதோடு, உடல்நலம் பாதிக்கப்பட்டு சிகிச்சை பெற்று வருபவர்கள் விரைவில் முழு உடல்நலம் பெற இறைவனைப் பிரார்த்திக்கின்றேன்.
கடந்த ஆண்டு இதே நிகழ்வு காரணமாகப் பல உயிர்களை இழந்த துயரத்தில் இருந்து இன்னும் முழுமையாக மீளாத நிலையில், மீண்டும் இப்படியொரு சம்பவம் நிகழ்ந்திருப்பது, அரசு நிர்வாகத்தின் அலட்சியத்தையே காட்டுகிறது. இது போன்ற சம்பவங்கள் நிகழாத வண்ணம், இனிமேலாவது தமிழக அரசு கடுமையான முன்னெச்சரிக்கை நடவடிக்கைகளை மேற்கொண்டு தடுக்க வேண்டும் என்று வலியுறுத்திக் கேட்டுக்கொள்கிறேன்” என தெரிவித்திருந்தது குறிப்பிடத்தக்கது.
